Тайландын цагдаа нар 12  хүнийг хордуулж, аминд нь хүрсэн хэргийн сэжигтэн эмэгтэйг Бангкок хотод баривчилжээ. Сарарат Рангсивутапорн 2020 оноос хойш хохирогчдыг цианидаар хордуулж, үхэлд хүргэсэнд буруутгагдаж буй. Хохирогчид бүгд түүний танилууд бөгөөд экс найз залуу нь мөн амиа алдсан байна.

Энэ сарын эхээр цуг аялалд явсан найз нь нас барсны дараа талийгаачийн ар гэрийнхэн нь Рангсивутапорнийг сэжиглэж цагдаад гомдол гаргаснаар дуулиант хэргүүд ил болжээ.

Тэрээр найзтайгаа Рачабури мужид голын эрэг дээр болдог буддын шашны зан үйлд оролцсон байна. Энэ үеэр түүний найз эмэгтэйн бие гэнэт муудаж, голын эрэг дээр амьсгал хураажээ. Хохирогчийн биед задлан шинжилгээ хийхэд цианид илэрсэн байна. Бусад 11 хохирогчийг мөн ийм байдлаар амиа алдсан гэж цагдаа нар үзжээ. Харин сэжигтэн гэм буруутай гэдгээ хүлээн зөвшөөрөхгүй байгаа аж.