Засгийн газрын өргөтгөсөн хуралдаанаар нийслэлийн тулгамдсан асуудлуудыг хэлэлцэж байна. Энэ үеэр Нийслэлийн Засаг дарга Д.Сумъяабазар нийслэлийн авто замын түгжрэлийн өнөөгийн нөхцөл байдлын талаар танилцуулга мэдээллийг хүргэлээ.

 

Тэрээр “Өнөөдөр монгол орны нийт газар нутгийн 0.3 хувь дээр 1.5 сая иргэн амьдарч байна. Нийт тээврийн хэрэгслийн 54.4 хувь нь Улаанбаатар хотын авто замын хөдөлгөөнд оролцож байна. Хотын иргэдийн өмнө тулгамдаж буй гол асуудал нь замын түгжрэл гэдгийг судалгаагаар гаргаж ирсэн. Улаанбаатар хотын авто замын хөдөлгөөнд тээврийн хэрэгслийн зорчих хурд 13 км/цагийн хурдтайгаар, ид оргил ачааллын үеэр  8,9 км/цаг хурдтай оролцож байна. Энэ нь дэлхийн стандартаар тэг зогсолтод хүрсэн гэж ойлгож болно. Улаанбаатар хотын замын 78 хувь нь түгжрэлтэй байна. Иргэд нэг км замыг дунджаар 10 минутад туулж байна.

 

2013 онтой харьцуулахад авто замын сүлжээний даац гурав дахин хэтэрсэн нь автомашины тоо өссөнтэй холбоотой. Түгжрэлийн алдагдсан боломжийн нийт өртөг 2024 онд ДНБ-ий 10 хувьд хүрэхээр байна. Улаанбаатарын иргэд өдөрт 2.5 цаг, жилд 35 өдрийг түгжрэлд зарцуулж байгаа судалгаа гарсан байна. Иймээс замын ачааллыг бууруулах туслах замуудыг нэмэгдүүлж, гол замын багтаамж ихтэй нийтийн тээврийг бий болгох хэрэгтэй.

 

Түгжрэлийн алдагдсан боломжийн нийт өртгийг тооцож үзэхэд 2020 онд алдагдлын хэмжээ 1 тэрбум доллар буюу  2.7 их наяд орчим төгрөгийн алдагдлыг улсаараа хүлээгээд явж байна.  Харин өнгөрсөн 10 жилийн хугацаанд 11.8 их наяд төгрөгийн алдагдлыг бид хүлээсэн байна. Ирэх таван жилээр тооцвол 24.3 их наядын алдагдлыг хүлээх тооцоолол гарсан” гэлээ.

 

Улаанбаатар хотын авто замын түгжрэлийг бууруулах хүрээнд дараах ажлыг яаралтай эхлүүлэх шаардлагатай байгааг Нийслэлийн Засаг дарга Д.Сумъяабазар танилцуулав.