Энэтхэгийн сарны судалгаа хэр ач холбогдолтой вэ?

Энэтхэг улс сарны өмнөд туйлын ойролцоо газардсан анхны улс болов
Сарны гадаргуу дээр болон доорх температур ялгаатай
Тодруулбал сарны гадаргуу дээрх температур цельсийн 60 хэм байжээ

Өнгөрсөн сард Энэтхэг улс сарны өмнөд туйлын ойролцоо газардсан анхны улс болж түүхэнд бичигдсэн. “Чандраян-3” нэртэй хөлөг хоёр долоо хоногийн хугацаанд судалгаа хийж, сарны мөчлөг дуусахтай зэрэгцэн “унтлагын” горимд шилжсэн.

Тус улсын Сансар судлалын байгууллага судалгааны явцад олдсон зүйлс, авсан зургийг тогтмол хуваалцаж буй. Эдгээр шинэ ололт нь Энэтхэгийн олон иргэнд догдлол авчирсан ч зарим нь уг судалгаа үнэхээр үр дүнтэй эсэхэд эргэлзэж байна.

Тэгвэл ВВС агентлаг НАСА-д ажиллаж байсан Мила Митра хэмээх хүнээс Энэтхэг улсын хийсэн сарны судалгаа хэр үр дүнтэй, ач холбогдолтой болохыг тодруулжээ.

Унтлагын горимд шилжихээс өмнөхөн “Чандраян-3” хөлөг 100 метр орчим зам туулсан. Энэ нь секундэд 1 сантиметр хурдлах чадвартай хөлгийн бүтцээр бодож үзвэл маш урт хугацаа аж.
Митрагийн хэлснээр уг ажиллагааны нэгэн чухал хэсэг нь өмнө нь бараг л судлагдаж байгаагүй сарны өмнөд туйлд эвдрэл, гэмтэл авалгүй газардаж, судалгаагаа гүйцэтгэсэн явдал гэв.

Судалгааны явцад хамгийн түрүүнд сарны хөрснөөс 10 сантиметр орчим ухаж, дээж авахад гадаргуу дээр болон доорх температур нь ялгаатай гарчээ. Тодруулбал сарны гадаргуу дээрх температур цельсийн 60 хэм байсан бол найман сантиметр ухахад 10 хэмээр буурсан аж.

Эрдэмтэн Митрагийн тайлбарласнаар уг мэдээлэл нь сарны хөрс сайн тусгаарлагч болно гэдгийг харуулсан учраас ач холбогдолтой судалгаа болсон байна. Мөн гадаргуун доор ус, мөс байж болзошгүйг илтгэж байгаа гэсэн юм.