Улсын Их Хурлын Хууль зүйн байнгын хорооны өнөөдрийн хурлаар Гэр бүлийн тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүдийг хэлэлцэн шийдвэрлэлээ.

Тодруулбал уг хуулийн төслийг Засгийн газраас энэ сарын 3-ны өдөр өргөн мэдүүлсэн. Үүнийг дэмжих эсэхээр санал хураалт явуулахад хуралд оролцсон гишүүдийн олонх буюу 85.7 хувь нь дэмжжээ.

Иймд энэ талаарх Байнгын хорооны санал, дүгнэлтийг нэгдсэн хуралдаанд танилцуулахаар шийдвэрлэлээ хэмээн Улсын Их Хурлын Хэвлэл мэдээлэл, олон нийттэй харилцах газраас мэдээллээ.

Гэр бүлийн тухай хууль нь хувийн эрх зүйн буюу иргэний эрх зүйн харилцааг зохицуулдаг суурь хуулиудын нэг юм. Одоо хүчин төгөлдөр мөрдөгдөж буй Гэр бүлийн тухай хуулийг 1999 онд баталсан. 

Үүнээс хойш гэрлэх, гэрлэлт цуцлах, хүүхдийн эрх, хууль ёсны эрх ашиг хөндөгдөх, зөрчигдөх, сэргээх зэрэг харилцаа ихсэж байгаа бөгөөд үүнээс үүсэх үр дагаврыг нарийвчлан зохицуулаагүй байна.