МҮОХ-ноос гадаад хамтын ажиллагааг өргөжүүлэх бодлогын хүрээнд Унгар улсын олимпын хороотой хамтран ажиллах санамж бичгийг Будапешт хотноо байгуулсан талаар Монголын Үндэсний Олимпын Хорооноос мэдээллээ.

Хоёр улсын Үндэсний спортын хороо нь өндөр хөгжсөн спортын төрлүүдэд тамирчдын хамтарсан бэлтгэл хийх, спортын шинжлэх ухаан, спортын анагаах ухааныг хөгжүүлэхэд мэргэжилтэн солилцох болон олон талт хамтын ажиллагааг өргөжүүлэх чиглэлээр хамтран ажиллахаар хэлэлцсэн байна.

Унгарын олимпын хороо нь Франц, Грек, АНУ, ХБНГУ болон Австралийн олимпын хорооны дараа буюу 1895.12.19-ны өдөр байгуулагдсан зургаа дахь олимпын хороо бөгөөд “Афин 1896” анхдугаар Олимпын наадамд оролцогч орон төдийгүй Dr. Ferenc Kemeny нь Олон улсын олимпын хороог үүсгэн байгуулагчдын нэг юм.

Санамж бичигт гарын үсэг зурах ёслолын ажиллагаанд МУ-ын Засгийн газрын гишүүн, Спортын сайд Б.Бат-Эрдэнэ, МҮОХ-ны Тэргүүн дэд ерөнхийлөгч Ч. Наранбаатар, туялзуур сэлэмний Олимпын 2 удаагийн аварга Mr. Bence Szabó нар хүндэт зочноор оролцож, МҮОХ-ны Ерөнхий нарийн бичгийн дарга, “Бээжин 2008” олимпын аварга Э.Бадар-Ууган, Унгарын олимпын хорооны Ерөнхий нарийн бичгийн дарга, Орчин үеийн таван төрөлтийн Олимпын аварга багийн гишүүн Mr. László Fábián нар үзэглэв.

МҮОХ нь ОУОХ-ны дэмжлэгтэйгээр Унгар улсын спортын шинжлэх ухааны их сургуулийн дасгалжуулагч нарт зориулсан богино хугацааны сургалтад туялзуур сэлэм, жүдо, бокс, волейбол зэрэг спортын багш дасгалжуулагч нарыг хамруулаад байна.