Ерөнхийлөгчийн сонгуулийн сурталчилгаа эхэлсэнтэй зэрэгцээд сумандаа очлоо. Гурван намын сонгуулийн штаб хоорондоо 200 метр ч хүрэхгүй зайтай байрлаж байна.

Өглөөнөөс орой болтол өсгөгчөөр дуу хангинаад л байх аж. Сурталчилгааны багийнхан хоорондоо мөргөлдөж, осол аваар гаргах нь холгүй л хэдэн тийшээ тоос татуулан давхиад байх. Тэгсэн мөртлөө энд тэнд тааралдахаар мэнд мэдэлцэх нь байтугай машиныхаа цонхоор бие бие рүүгээ муухай харчихаад л давхилдаад байх юм. Сумандаа очсоных багын хэдэн найзтайгаа уулзахаар гар утас руу нь залгав. Сумын сургуулийн багш найз минь МАН-ын штаб дээр байна гэж хэлэхээр нь явж очлоо.Тэгсэн нөгөө найз маань Ардчилсан намын сонгуулийн штаб дээр байгаа сураг гарав. Очоод уулзъя гэтэл МАН-ын гишүүн найз “Тийшээ очиж болохгүй.

Манай намынхан хардаад сүйд болно. Танай найз чамтай уулзчихаад тэр намын тэрэнтэй уулзаж явна гээд сумаар нэг яриа болно. Дараа уулз” гээд хавьтуулсангүй. Ардчилсан намын найзыг дуудтал бас л ирсэнгүй. Тэр хоёр сонгуулийн сурталчилгаа эхэлснээс хойш өдрөөр огт уулзаагүй гэнэ. Бүр тааралдахаараа хоорондоо мэнд мэдэлгүй өнгөрдөг байна. Харин харанхуй шөнө таарвал сонин сайхан ярилцаад, инээж хөхрөөд багын найзууд шиг байж байгаад салдаг гэж ярилаа.

Манай суманд Ерөнхийлөгчийн сонгууль иймэрхүү байдалтай өрнөж байв. Наадам болохоор сумынхан минь эвлэрэх байгаа.