Cүхбаатар аймгийн Ардчилсан намын дарга М.Идэрбатын ярилцлагад өгөх хариу

Сүхбаатар аймгийн 12 дугаар тойрогт МАН-аас нэр дэвшигчдэд эрх зүйн туслалцаа үзүүлж байсан хуулийн багийнхны байрласан байр руу АН-ын хэсэг залуус дайрч орсон асуудал одоо цагдаагийн байгууллагад шалгагдаж байна. Хэрэг явдалтай холбоотойгоор МАН-аас мэдэгдэл гаргасны хариуд Сүхбаатар аймгийн АН-ын хороо мөн мэдэгдэл гаргажээ. Аймгийн АН-ын хорооны дарга М.Идэрбат орон нутгийн телевизээр мөн байр сууриа илэрхийлсэн байна. Харин М.Идэрбат дарга энэ ярилцланыхаа үеэр андуурч эндүүрэв үү, аль эсвэл санаатай санамсаргүйгээр хэлчихэв үү, бодит үнэнээс зөрсөн хэд хэдэн мэдээллийг өгөв.

Иймээс түүний энэ мэдээлэлд бодит хариу өгөх нь зүйтэй гэж үзлээ.

1.“Тусгай байр барьж Улаанбаатар хотоос бэлтгэгдсэн хүмүүс авчирсан...Тэнд байсан хүмүүсийг судлаад үзэхэд хуулийн мэргэжилтэй, хуулийн чиглэлийн ганц ч хүн байхгүй, нотлогдохгүй байгаа” гэжээ.

-Харин бодит үнэн гэвэл тэнд “Шударга ёсны дэнс” өмгөөллийн Хязгаарлагдмал хариуцлагатай нөхөрлөлийн хуульчид ажиллаж байгаа юм. Тус нөхөрлөлийн захирал Д.Отгонбат Сүхбаатар аймгийн МАН-ын хорооны дарга Ш.Лхамсүрэн нар эрх зүйн тусламж үйлчилгээний чиглэлээр хамтран ажиллах албан ёсны гэрээ байгуулсан байдаг. Энэ хүрээндээ л ажиллаж байгаа хэрэг. Одоо 3 өмгөөлөгч, 4 туслах, 2 жолооч гэсэн 9 хүний бүрэлдэхүүнтэй ажиллаж байна.

2.”50 гаруй хуурамч хаяг нээчихсэн, манай намын нэр дэвшигчдийг гүтгэсэн мэдээллүүдийг эндээс явуулж байгаа нь нотлогдож байх шиг байна... Бидэнд нийт 53 нууц хаяг байна. Сошиал орчинд гарч байгаа мэдээллүүдийг тулгаад үзэхээр яг таарч байгаа” гэж М.Идэрбат дарга эндүүрэв.

-Үүнд өгөх хариулт гэвэл хуулийн байгууллага шалгаж тоогтоогоогүй байхад 50 гаруй хаяг нээчихсэн, АН-ын нэр дэвшигчдийг гүтгэсэн мэдээллүүдийг эндээс явуулж байгаа нь нотлогдсон мэтээр ор үндэсгүй гүтгэлэгийн шинжтэй зүйл ярьж байгаа нь арай л гоомой явдал юм. Шалгаж байгаа асуудлыг цээжний бангаар ингэж “нотлогдож байх шиг байна” хэмээн эргэлзсэн таамаглал маягаар ярих нь цагдаагийн байгууллагын шалгах ажиллагаанд хөндлөнгөөс нөлөөлөх гэсэн оролдлого биш биз гэж харагдахаар байна.

3.”Худал зүйл худал л байдаг. Цагдаа дээр өгч байгаа мэдээллээр бол ухуулгын байр юмаа, ухуулгын ажилтнууд юмаа гэсэн байдлаар хэлсэн байна лээ...Өөрсдөө ийм зөрүүтэй мэдээлэл өгч байгаа. Үүнээс үзэхэд эдгээр хүмүүс нь манай намын нэр дэвшигчдийг харлуулах гэсэн Ардын намын хүмүүс гэдэг нь тодорхой байна” гэлээ.

-Болсон явдлыг аймгийн Цагдаагийн байгууллага мөрдөн шалгаж байгаа. Аль ч асуудал эцэслэн тогтоогдоогүй. Гэтэл М.Идэрбат даргын ярианаас харвал цагдаа дээр хэн юу ярьсан, ямар мэдүүлэг өгсөн талаар дурджээ. Багцаа таамгаараа ингэж ярив уу, эсвэл мөрдөн шалгах ажиллагааны нууц задарчихсан хэрэг үү. Хэрэв мөрдөн шалгах ажиллагааны нууц задарсан гэх үндэслэл бий болсон тохиолдолд бид холбогдох байгууллагад гомдлоо гаргах болно.

Эцэст нь хэлэхэд тус хуульчдын баг нь Сонгуулийн хуулийг тайлбарлан таниулах, хууль зөрчсөн үйлдлээс урьдчилан сэргийлэх, сургалт хийх, цахим орчин дахь хууль зөрчигчдийг мэдээлж гомдол гаргах, аймгийн МАН-ын хорооны хууль ёсны ашиг сонирхлыг хамгаалах чиглэлээр ажиллаж байгаа гэдгээ тодотгоё.

Cүхбаатар аймгийн Ардчилсан намын дарга М.Идэрбатын ярилцлагад өгөх хариу

2020-06-20 10:03:48

Жиргэх Хуваалцах

Тухайн мэдээлэлд өгөх таны хариулт?

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд moment.mn хариуцлага хүлээхгүй.

Нийт сэтгэгдэл: 0

Шинэ мэдээ