Цар тахлын үед иргэдийн хандиваар цугларсан мөнгөнөөс Нийслэлийн удирдлагууд өөрсдөдөө сая, сая төгрөгийн урамшуулал хуваарилсан баримт ил болоод байгаа билээ. 

Тодруулбал, С.Амарсайхан Нийслэлийн Засаг даргаар ажиллаж байхдаа захирамж гаргаж, нэр бүхий 21 албан тушаалтанд тус бүр нэг сая төгрөгийн урамшуулал олгосон байна. Хамгийн гол нь иргэд, хүүхэд хөгшдийн өгсөн хандивын мөнгөөр албан тушаалтнууд өөрсдийгөө урамшуулсанд олон нийт бухимдалтай хандаж байна. Нийслэлийн онцгой комиссын дансанд төвлөрлөсөн хандив тусламжийн орлогоос 21 сая төгрөгийг доорх албан тушаалтнуудад урамшуулал болгон хуваарилахаар даалгасан байна. 

Урамшуулал авсан нэр бүхий албан тушаалтнуудын зарим нь дансандаа нэг сая төгрөг орсноо ч мэдэхгүй байгаагаа учирлажээ. Мөн "иргэдийн хандивын мөнгөнөөс урамшуулал олгосныг мэдээгүй, буцаагаад өгчихье" зэргээр тайлбар өгсөн. Халдварын голомт дээр өдөр шөнөгүй ажиллаж, гол ажлыг гардан гүйцэтгэж байгаа жирийн нэгэн төрийн албан хаагч, онцгойгийн ажилчдыг урамшуулах байтал НЗДТГ болон нийслэлд харьяалагддаг дарга, захирлуудыг урамшуулсанд олон нийт дургүйцэж, эгдүүцэж  байгаа юм.

Дарга нар өөрсдөдөө зориулж захирамж, гаргаж, урамшуулал аваад суух нь шударга явдал уу. Нөгөө талд, компаниуд орлогоосоо, хүүхдүүд хадгаламжаасаа, хөгшид нь тэтгэврийн мөнгөө хандивласан байхад тэр мөнгийг нь 21 даргад  урамшуулал болгон тараах нь ёс зүйн хувьд байж болох уу?

Урамшуулал хуваарилсан нэр бүхий 21 албан тушаалтны жилийн орлого, хадгаламжийг ХОМ-ээс нь шүүж үзлээ.  Зарим нь дансандаа нэг төгрөгийн урамшуулал орсныг мэдэхгүй байх нь аргагүй юм байна. Учир нь жилийн 100, 300 сая орлоготой албан тушаалтнууд цөөнгүй байна.  Жишээ нь, Нийслэлийн Засаг даргын орлогч Ж.Батбаясгалан жилийн 103 сая, хотын ерөнхий менежер Т.Гантөмөр  жилийн 107 сая, Улаанбаатар цахилгаан түгээх сүлжээ компанийн захирал Д.Баярсайхан жилийн 344 сая төгрөгийн орлоготой юм байна.

Ингээд иргэдийн хандивын мөнгөнөөс сая төгрөгийн урамшуулал авсан 21 албан тушаалны жилийн орлого, хадгаламжтай танилцана уу.