УИХ-ын 75 гишүүний 30 гаруй нь томилолт нэрийн дор орон нутгийн сонгуульд дайлаар мордсоноор  Г.Занданшатарын танхим өнөөдрийн чуулганаа хуралдуулж чадахгүй цонхлоод байна. Томилолт нэрийн дор үндсэн ажлаа хийдүүлж яваа хүмүүс бол МАН-аас УИХ-д сонгогдсон гишүүд юм.

УИХ-ын дэгийн тухай хуульд зааснаар Даваа гаригт УИХ дахь намын бүлгүүд, Мягмар, Лхагва гаригт Байнгын хороод, Пүрэв, Баасан гаригт чуулган хуралдаж, хуулийн төслүүдээ хэлэлцдэг. Шаардлагатай тохиолдолд чуулганыг Пүрэв, Баасан гаригаас бусад өдрүүдэд ч хуралдуулах нь бий. Гэвч өчигдөр гишүүдийн ирц тааруугаас чуулганы хуралдааныг үдээс өмнөдөө “домоглоод”  энэ өдрийн ажлаа дуусгасан бол өнөөдөр бүтэн “цонхоллоо”.

Энэ бол эрх баригчдын ард түмнээ басамжилж буй үйлдэл юм.

Аймаг, нийслэл, сум, дүүргийн Иргэдийн Хурлын Төлөөлөгчийг сонгох сонгууль бол  УИХ-аас тусдаа асуудал. Гэтэл гишүүд сонгогдсон тойрог дээрээ оччихсон, боршур тараахаас эхлээд “Манай энэ төлөөлөгчийг сонгоод өгөөрэй” гээд сурталчилгаа хийж явна. Зарим нэг гишүүн нь тойрогтоо мөнгө тарааж байна гэх яриа ч сонсогдож буй.

МАН-ын гишүүд ажлаа хийдүүлж яваатай эвлэрэхгүй гэдгээ УИХ-ын гишүүн Н.Алтанхуяг өчигдрийн чуулганы хуралдааны үеэр сануулсан. Тэрбээр “Орон нутгийн томилолт авсан гээд байгаа гишүүд чинь орон нутгийн сонгууль дээр ажиллаж байна. Одоо орон нутгийн сонгуульд ялуулж өгвөл ингэнэ тэгнэ гэж яриад явж байна. Гишүүдээ дуудаач, 62 гишүүнээ цуглуулахгүй бол би өнөөдрийн хуралдаанд суухгүй. Орхон аймагт нэг гишүүн чинь очоод өдөр шөнөгүй сонгуулийн сурталчилгаа хийж байна. Ингэж болохгүй. Шударга бай” гэж хэлсэн билээ.

Уг нь УИХ –ын гишүүд өдийд Монгол Улсын 2021 оны төсөв, 2021 оны Мөнгөний бодлого зэрэг цаг хугацаатай уралдаж хэлэлцэх ёстой чухал төслүүд дээр ажиллан,  толгой өөд татах завгүй суух ёстой ч үндсэн ажлаа орон нутгийн сонгуулиас дорд үзэв.