Хоёрдугаар сарын 1-ний өдөр буюу энэ пүрэв гарагт автомашиныг улсын дугаарын тэгш, сондгойгоор хязгаарлан замын хөдөлгөөнд оролцуулах шийдвэр дуусгавар болно. Өнгөрсөн оны арванхоёрдугаар сарын 18-ны өдрөөс уг шийдвэр хэрэгжиж эхэлсэн бөгөөд сар гаруйн хугацаанд мөрдөөд байгаа юм. Уг шийдвэр гарснаар замын хөдөлгөөний ачаалал хэр буурсан, автобусаар зорчих иргэдийн тоо нэмэгдсэн эсэх цаашлаад сар шинийн баяртай холбоотойгоор хязгаарлалт хийх эсэх нь одоогоор тодорхойгүй байна.

Энэ талаар  Нийслэлийн Засаг даргын хэвлэлийн төлөөлөгч Н.Сугараас тодруулахад “Одоогоор тээврийн хэрэгслийн улсын дугаарын тэгш сондгойгоор хөдөлгөөнд оролцуулах зохицуулалтыг сунгах тухай мэдээлэл ирүүлээгүй. Замын хөдөлгөөний удирдлагын төв рүү нэгдсэн мэдээлэл авах албан бичиг явуулсан. Мэдээлэл ирэх үед эргэн мэдээлэх болно” гэв.