Чингис Хаан олон улсын нисэх буудал хүрэх тууш зам дээр авто тээврийн осол гарч, зам хаасныг МИАТ ТӨХК мэдээллээ. Тодруулбал Улаанбаатар хотод их хэмжээний цас орсны улмаас халтиргаа гулгаа үүсэж автомашинууд мөргөлдсөн байна.

09:15 цаг

Өнөөдөр буюу 2024 оны гуравдугаар сарын 27-ны өглөө Хан-Уул дүүргийн 8 дугаар хорооны нутаг дэвсгэр “Чингис хаан” олон улсын нисэх буудал хүртэлх тууш зам руу орох хэсэгт 17 хүртэлх тооны автомашин мөргөлдсөн гэх дуудлага мэдээлэл цагдаагийн байгууллагад бүртгэгдэж, шалгалтын ажиллагааг явуулж байгааг ТЦА-аас мэдээллээ.

Цаг агаарын нөхцөл байдлаас шалтгаалж, үзэгдэх орчин хязгаарлагдмал болох, замын зорчих хэсэгт халтиргаа, гулгаа үүсэх нөхцөл байдал үүсэж байгаа тул та бүхэнд:

• Тохиромжтой хурдыг сонгох:
• Хажуу, хоорондын зайг зөв барьж явах;
• Хөдөлгөөн эхлэх, чиг өөрчлөн байрлан явах үйлдлийг зөв гүйцэтгэх;
• Аюул бүхий хэсэгт гүйцэх, гүйцэж түрүүлэх үйлдлийг хийхгүй байх;
• Шил арчуур, цан үлээгүүр зэрэг техникийн бүрэн байдлыг хангасан байх;
• Зайлшгүй зогсолт хийсэн тохиолдолд бусдад анхааруулах, аюулгүй байдлыг бүрэн хангаж хөдөлгөөнд оролцохыг зөвлөж байна.