“Диспетчерийн Үндэсний Төв” ТӨХХК-ийн Төв диспетчерийн албаны дарга Б.Ганбатаас дулаан, эрчим хүчний өвлийн бэлтгэл ажлын талаар тодрууллаа.

- Бид энэ өвлийн цахилгаан, дулааны горимыг дараах байдлаар тооцоолсон -

- Сайн байна уу. Найман сарын 19-ний Өдрийн сонинд эрчим хүчний зөвлөх инженер Р.Ганжуур гуай өвлийн бэлтгэл ажлын тухай ярилцлага гарсан байна. Та энэ талаар тайлбар өгнө үү?

- Сайн сайн байна уу? Би Р.Ганжуур гуайн ярилцлагыг уншсан. Р.Ганжуур гуай маш буруу ярьсан байна лээ. 2025-2026 оны өвлийн их ачааллын үед өсөн нэмэгдэх хэрэглээг хангах зорилгоор бид бүхэн 200 МВт-ын эх үүсвэрийг шинээр оруулж байгаа. Оргил ачаалал өнгөрсөн оны мөн үеэс 100 гаруй МВт-аар нэмэгдэнэ.

- “ДЦС-4” ТӨХК-д дулааны ачаалал шилжүүлэхэд хүндрэлтэй байгаа талаар ярьсан байна. Энэхүү нөхцөл байдлын талаар мэдээлэл өгнө үү?
-“ДЦС-4” ТӨХК нь өнгөрсөн жилийн мөн үетэй адил үндсэн тоноглолтойгоор ажиллана. Шинэ эх үүсвэр ашиглалтад орсноор тус станцын цахилгаан ачааллыг бууруулж, дулааны эрчим хүчний үйлдвэрлэлийг нэмэгдүүлэн ажиллах юм аа.

- Энэ өвөл нийслэлийн дулаан хангамж хэвийн явагдана гэж ойлгож болох уу?
- Тийм ээ, энэ өвлийг бид бүхэн амжилттай давахаар инженерийн тооцооллыг хийсэн. Ганжуур гуай мэдэхгүй байгаа бол бид бүхэн дээр ирж асуух хэрэгтэй шүү дээ.