Нийслэлийн ЗДТГ, Тээврийн цагдаагийн алба, Авто замын хөгжлийн газар, Замын хөдөлгөөний төлөвлөлт, зохицуулалт, инженерчлэлийн газар, Мэдээлэл, технологийн газар, Ачигч автомашинуудын нэгдсэн холбоо зэрэг байгууллага хамтран тээврийн хэрэгслийн нэгдсэн цахим үйлчилгээний https://smartcar.mn/ системээр дамжуулан тээврийн хэрэгслийг ачиж, журамлах үйл ажиллагааны мэдээллийг цахимаар авах боломжтой болгожээ.

Иймээс иргэн та хэрэв зөрчил гаргаж тээврийн хэрэгслээ журамлуулсан тохиолдолд цахим орчинд Smartcar системд нэвтэрч тээврийн хэрэгслээ зөөж шилжүүлсэнтэй холбоотой бүх мэдээллээ харах боломжтой болно. Жишээлбэл, шийдвэрийн төрөл, ачиж журамлах зөвшөөрөл олгосон цагдаагийн албан хаагчийн нэр, зөрчлийн заалт, ачилт хийсэн байршил, шилжүүлэх түр саатуулах байрны байршил, шилжсэн огноо, ачилт хийгдэх үед баримт болгон авсан тээврийн хэрэгслийн зураг гэх мэтчилэн мэдээлэл байх аж.