Ерөнхийлөгч Х.Баттулга өнгөрсөн хоёрдугаар сард БНХАУ-д айлчлахдаа 30,000 толгой хонь тус улсад хандивлах гэрчилгээг батламжийг тус улсын төрийн тэргүүн Ши Жиньпинд гардуулан өгсөн. 

Хандивын эхний ээлжийн 16,000 толгой хонийг Зам-Үүдэд аваачин 45 хоног тусгаарласан бөгөөд энэ хугацаа удахгүй дуусах юм байна.

Тусгаарлалтын 45 хоногийн хугацаанд хонь нэг бүрийг эрүүл ахуйн шинжилгээнд хамруулж, ариутгал халдваргүйтгэл хийж байгаа. Мөн БНХАУ-ын хилээр гаргаад дахин тусгаарлах эсэхийг хоёр талын ажлын хэсэг шийдэх гэнэ.

Дараагийн ээлжийн 14,000 хонийг голчлон зүүн гурван аймгаас бүрдүүлэх ажил үргэлжилж байна. Төлөвлөгөөний дагуу 10 дугаар сарын 6-нд 30 мянган хонийг бүгдийг өгч дуусах ёстой юм байна.