Улсын нэгдүгээр төв эмнэлэгт бөөр шилжүүлэн суулгах мэс заслыг 10-20 сая төгрөгийн өртгөөр хийдэг. Тэгвэл бөөр шилжүүлэн суулгах мэс засал хийдэг байраа “Ковид 19” цар тахлын улаан бүс болгосноор иргэд Монголдоо эмчилгээ хийлгэх боломжгүй болжээ. Энэ талаар жүжигчин Б.Навчаа мэдээлэл хийлээ.   

Тэрээр “Миний найз Т.Рэгзэнгийн бөөр 95 хувь нь ажиллагаагүй болж, эмчлүүлэх шаардлагатай байна. Гэтэл манай улсад бөөр шилжүүлэн суулгадаг ганц эмнэлэг болох УНТЭ-ийн мэс заслын байрыг “Ковид 19” цар тахлын улаан бүс болгосноор олон хүн хохирч, хагалгаанд орж чадахгүй байна. Үүний бодит жишээ нь манай найз.

Уг нь Монголдоо хагалгаа хийлгэвэл 10-20 сая төгрөгийн өртөгтэй. Гэтэл хавраас хойш энэ хагалгааг хийхгүй байгаа учраас яаралтай БНСУ-д очиж эмчлүүлэх шаардлагатай боллоо. Солонгост бол 300 гаруй сая төгрөгөөр эмчлүүлнэ.

Бид монгол эмч нартаа итгэхгүйдээ гадаадад очиж эмчлүүлэх гээд байгаа юм биш. Энэ Засгийн газар, Эрүүл мэндийн яамны бодлогогүй үйлдэл. Монголд зөвхөн “Ковид 19” гэдэг өвчин байгаа юм шиг ханддагаа болих хэрэгтэй. Олон хүн янз бүрийн өвчнөөр өвдөж шаналж байна” гэсэн юм.

Энэ талаар УНТЭ-ээс тодруулахад "Эрхтэн шилжүүлэх мэс заслыг УНТЭ-ийн зүүн байранд хийдэг байсан. “Ковид 19” цар тахлын улмаас энэ байранд байсан тасгуудыг баруун байр руу шилжүүлэн мэс заслуудаа хийж байгаа" гэлээ.