Сангийн сайд Б.Жавхлангийн санаачилгаар ирэх оны төсвийн хуваарилалт, зарцуулалт, бодлогын талаар Засгийн газрын зарим сайд мэдээлэл өгөв. Энэ үеэр Батлан хамгаалахын сайд Г.Сайханбаяр цэрэг татлага, оюутан цэрэг, шинээр татагдсан цэргүүдийн дунд илэрч буй халдварын нөхцөл байдлын талаар ярилаа.

Тэрээр “Залуус иргэнийхээ үндсэн үүргийг биелүүлж, эх орноо хамгаалахаар цэргийн албанд ирж байгаа. “Ковид 19”-ийн халдвар аваад эдгэсэн залуус бий. Тэднийг цэрэг татлагаас өмнө уушги болон бусад эрхтэнд өөрчлөлт орсон эсэхийг үзэж, хянаад эмчилгээ шаардлагатай хүмүүсийг цэргийн албанд татаагүй.

Мөн цэргийн эмнэлэг, цэрэг татлагын товчооны үзлэгээр зүгээр гарчихаад татагдсаны дараа халдвар илэрч байгаа тохиолдол байна. Цэргүүдийг ангид хуваарилсны дараа 200 гаруй цэрэг, цэргийн алба хаагчаас халдвар илэрсэн. Тэднийг харьяа аймгийн эмнэлэгт тусгаарлаад цээжний зураг авах, шинжилгээ, ажиглалт хийх гээд нарийн хянаж байна. Гэхдээ халдвар илэрсэн цэргүүд харьцангуй хөнгөн, шинж тэмдэг багатай байгаа. Халуурах, уушгинд өөрчлөлт гарсан тохиолдолд Цэргийн төв эмнэлэг рүү шилжүүлээд, тангараг өргөхөөс нь өмнө халах, гэр рүү нь буцаах арга хэмжээг авч байна. Харин цэргийн ачааллыг даах хэмжээнд байна гэж үзвэл тодорхой хугацаанд ямар ачаалал өгөх вэ гэдгээ тооцно.

Оюутан цэрэг хоёр жил зохион байгуулагдаагүй, ирэх оноос хэвийн үргэлжилнэ. 2022 ону гуравдугаар сарын 1-ээс аймаг, дүүргийн цэргийн штабууд дээр бүртгэл хийгдэнэ” гэлээ.