Засгийн газрын хуралдаанаас гаргасан шийдвэрийг БШУ-ы сайд, Цахим хөгжлийн сайдын үүрэг гүйцэтгэгч Л.Энх-Амгалан мэдээлэв.

Тэрбээр, Цахим үндэстэн хөтөлбөрийг эрчимжүүлэх асуудлыг ЗГ-ын хуралдаанаар хэлэлцлээ. Өнөөдрийн байдлаар 21 аймгийн 1200 үйлчилгээ, улсын хэмжээнд төрийн 685 үйлчилгээ цахимжсан байна. 2022 оны төгсгөлөөр нэмж 600 орчим үйлчилгээг И-Монголиад оруулахаар ажиллаж байна. Ингэснээр төрийн 1200 орчим үйлчилгээ И-Монголиагаар дамжин иргэдэд түргэн шуурхай, авлигагүй, хүндрэлгүйгээр гар утаснаасаа авах боломжийг бүрдүүлнэ.

2022 оны наймдугаар сарын 9-ний байдлаар Улсын бүртгэлийн ерөнхий газраас 252 мянган иргэн тоон гарын үсгээ аваад байна.

Тоон гарын үсэг бол цахим шилжилтийн үед ашиглах гол хэрэгсэл байна. Тоон гарын үсгээ авсан иргэд маань өөрийнхөө байгаа газраас төрийн бүхий л үйлчилгээ авах боломж бүрдэнэ. Мөн арилжааны банкуудаас зээл авах бол зээлийн гэрээнд очиж гарын үсэг зурах шаардлагагүй тоон гарын үсгээ ашиглах юм. Цаашид нотариатын үйлчилгээ шаардлагагүй болно.