Дарханы замын хэрэгт холбогдсон албан тушаалтнуудын хэрэгт нийслэлийн Прокурорын газраас яллах дүгнэлт үйлдэж, шүүхэд шилжүүлэхэд бэлэн болжээ. Дарханы замын тендерийг шалгаруулсан албан хаагчдыг АТГ-аас шалгаж, хэрэгт холбогдуулан ЗТХЯ-ны Зам ашиглалтын газрын дарга асан Х.Оргил-Эрдэнийг хуулийн байгууллага шалгаж буй. Улмаар түүнд холбогдох хэргийг прокурор хянаж дуусчээ.

Х.Оргил-Эрдэнийг өмнө нь буюу 2019 онд БНХАУ-ын хөрөнгө оруулалттай “Хэйлонжиан жиньеи рөүд энд бридж” ХХК-ийн ажилтнаас 20,000 юаны авлига авч байгаад баригдсан үндэслэлээр мөн баривчилж байсан юм. Гэвч дараа нь хорих шаардлагагүй гэж сулласан билээ.

Үүнээс гадна Зам тээврийн яамны дэд  сайд Ж.Бат-Эрдэнийн хэргийг бас шалгаж дуусчээ. Улмаар түүнд холбогдох хэргийг шүүхэд шилжүүлэхэд бэлэн болсон байна. Эргэн сануулбал, Түүнийг албан тушаалаа урвуулан ашиглаж Улаанбаатар-Дархан чиглэлийн авто замын бүтээн байгуулалтын ажилд бусдад давуу байдал бий болгосон, мөн үндэслэлгүй хөрөнгөжсөн гэх үндэслэлээр АТГ-аас шалгаж эхэлсэн байдаг.

Дэд сайд асан Ж.Бат-Эрдэнэ 2021 онд 800 гаруй сая төгрөгийн орлого олсноо хөрөнгө орлогын мэдүүлэгтээ тусгажээ. Жилийн өмнө 100 хүрэхгүй сая төгрөгийн орлого мэдүүлж байсан нь ийнхүү огцом өсч гэр бүлийн гишүүдийнх нь орлого нэмэгдсэн нь шалгах үндэслэл болсон талаар албаны эх сурвалж мэдээлж байлаа.