Нийслэлийн Засаг даргын ивээл дор “Asia Folk 2023” Азийн хотуудын ардын урлаг, гар урлалын наадмыг 2023 оны зургаадугаар сарын 15-20-ны өдрүүдэд Сүхбаатарын талбайд зохион байгуулна.

Наадмыг анх 2019 онд зохиож байв. Цар тахлын улмаас 2020-2022 онд цахимаар явуулсан бол энэ жилийн хувьд таван өдрийн турш зохион байгуулж, Сүхбаатарын талбайд үзэсгэлэн дэлгэхээр болжээ. Наадмын ерөнхий найруулагчаар “Хөсөгтөн” хамтлагийн ахлагч, УГЗ Д.Ариунболд ажиллаж байна.

Наадмын зохион байгуулагч Нийслэлийн жижиг дунд үйлдвэрлэлийг дэмжих төвийн дарга, Г.Гангамөрөн “Дэлхийн 10 гаруй орноос 280 гаруй төлөөлөгч цахимаар болон биечлэн ирж оролцоно. Энэ жилийн наадмын хүрээнд Монголынхоо гар урлаачдаа олон улсын зах зээлд гаргах хамтын ажиллагаанууд хийнэ. Маргаашаас хамтарсан үзэсгэлэн худалдаа Сүхбаатарын талбайд гарах юм. Иргэд, та бүхэн энэ сарын 19-ны өдрийг дуустал Сүхбаатарын талбайгаар зочилж, гар урлаачдаа дэмжээрэй” гэв.