Монгол улсын хэмжээнд нийт 145,247 оюутан суралцаж байгаагаас эрэгтэй оюутны тоо ойролцоогоор 30 хувь буюу 56,444 байдаг аж.

Өөрөөр хэлбэл дээд боловсрол эзэмшиж буй эрэгтэйчүүд эмэгтэйчүүдтэй харьцуулахад маш цөөн байгааг эндээс харах боломжтой. Түүнчлэн оюутнуудын нийгмийн идэвх, олон нийтийн арга хэмжээнд оролцсон байдлаар нь харьцуулахад эмэгтэй оюутан, сурагчид илүү идэвхтэй байв. Нэг ёсондоо эрэгтэй оюутнууд олон нийтийг хамарсан үйл ажиллагаанд бага оролцдог, дээд боловсрол эзэмших хувь бага байгаа нь эрэгтэйчүүдийн боловсролын түвшин, карьер, цалин хөлсний хэмжээ, дундаж наслалт гэх мэт олон хүчин зүйлүүдэд сөргөөр нөлөөлдөг байна.

Тиймээс эрэгтэй оюутнуудын нийгмийн идэвх оролцоог нэмэгдүүлэх, тэдний өрсөлдөх чадварыг сайжруулах, зөв эр хүн байх уриалгыг дэвшүүлэн Боловсрол, шинжлэх ухааны яам, Жендэрийн үндэсний хороо, Монголын Залуучуудын Холбоо болон Зөв Эрчүүд НҮТББ хамтран 2023 оны есдүгээр сарын 4-8-ны өдрүүдэд Монгол Улсын хэмжээнд үйл ажиллагаа явуулж буй томоохон их, дээд сургуулиудын нэгдүгээр дамжааны эрэгтэй оюутнуудтай уулзалт хийж байна. Улмаар их, дээд сургуулиудад түшиглэн "Зөв эрчүүд" клуб байгуулахаар боллоо. 

Энэхүү уулзалт нь нэг удаагийн уулзалт хийж өнгөрөхөөс илүүтэйгээр цаашид энэ чиглэлээр тогтмол үйл ажиллагаа явуулах клубүүдийг их дээд сургууль тус бүрд байгуулж байгаа гэдгээрээ онцлог, ач холбогдолтой юм. Монгол улсын хэмжээнд үйл ажиллагаа явуулж буй төрийн болон төрийн бус өмчит их, дээд сургуульд шинээр элсэн суралцаж буй эрэгтэй оюутнуудыг жендэрийн мэдрэмжтэй хандлагад чиглүүлэх, суурь харилцааны чадварыг хөгжүүлэх, эрэгтэйчүүдийн нийгэмд эзлэх байр суурь, нийгмийн оролцоог нэмэгдүүлэх, зөв амьдралын дадал зуршлыг хэвшүүлэхэд уриалах гэсэн үндсэн дөрвөн зорилготойгоор тус хэлэлцүүлэг, уулзалтыг зохион байгуулж байгаа аж. Уулзалт хэлэлцүүлэгт Монгол Улсад үйл ажиллагаа явуулж буй нийт 18 их, дээд сургуулийн нэгдүгээр түвшний 3,200 эрэгтэй оюутнууд оролцож байна. 

 

 

Эх сурвалж: Монголын Залуучуудын Холбоо