2023 онд ногоон эдийн засаг БНХАУ-ын дотоодын нийт бүтээгдэхүүнд 1.6 их наяд ам.долларын өсөлт дагуулсан байна.

2023 онд цэвэр эрчим хүчний салбар БНХАУ-ын 2023 оны эдийн засгийн нийт өсөлтийн 40 хувийг бүрдүүлсэн байна.

Өнгөрсөн онд ногоон эдийн засаг БНХАУ-ын дотоодын нийт бүтээгдэхүүний өсөлтөд 1.6 их наяд ам.долларын хувь нэмэр оруулсан нь шинэ дээд үзүүлэлт болсныг тус улсын "Эрчим хүч, цэвэр агаарын судалгааны төв" тайландаа онцоллоо. Энэ нь өмнөх оны мөн үеэс 30 хувиар өссөн дүн болж байна.

Энэхүү өсөлт нь БНХАУ-ын үл хөдлөх хөрөнгийн салбарын хямралыг тодорхой түвшинд нөхсөн аж. Мөн өнгөрсөн онд тус улсын дотоодын нийт бүтээгдэхүүн өсөлтийн зорилтот түвшин буюу 5.2 хувьд хүрч өсөхөд нөлөөлсөн байна.

Хэрэв цэвэр эрчим хүчний салбарын хувь нэмэр байгаагүй бол БНХАУ-ын эдийн засаг гурван хувийн өсөлттэй гарах байсныг улсын "Эрчим хүч, цэвэр агаарын судалгааны төв" онцолжээ.

Цэвэр эрчим хүчний салбар БНХАУ-ын эдийн засагт чухал байр суурь эзэлж буйг энэхүү судалгаа харуулж байна. Тухайлбал: аж үйлдвэрлэлийн бодлогын хүрээнд усан далан, төмөр зам, цөмийн эрчим хүч өргөн нэвтэрсэн аж. Мөн  нарны хавтан үйлдвэрлэл, цахилгаан автомашин зэрэг салбарт бүтээгдэхүүний илүүдэл гарснаар үнэ хямдарч, зарим талаар ашиг нь буурсныг судалгаанд онцолжээ.

Ц.Батжаргал