Засгийн газраас ирэх оны төсвийн төслийг УИХ-д өргөн барьж, анхны хэлэлцүүлгүүдийг хийж байна. Төсвийн төсөлд дурдсанаар 2022 оны төсвийн алдагдлыг 2.3 их наяд байхаар тооцжээ.

Тэгвэл сүүлийн хоёр жилийн хугацаанд төсвийн алдагдал 8.8 их наяд хүрснийг эдийн засагчид хэлж байна. Эдийн засагч Н.Энхбаяр энэ талаар "Үүнийг 2017, 2018 оны жишгээр харвал бүтэн нэг жилийн төсөв. Хоёрхон жилд ийм хэмжээний төсвийг илүү зарцуулж байна. Өөрөөр хэлбэл, хоёр жилийн дотор гурван жилийн төсвийг зарцуулсан гэсэн үг. Энэ нь боломжоосоо давсан хэт үрэлгэн байгаагийн илрэл. Төсвийн бүх шатанд, цаашлаад айл өрхөд нь ийм байна. Хүн болгон шахуу өр зээл тавьж байгаад хамгийн сүүлд гарсан гар утас, үнэтэй автомашин хэрэглэж байна. Энэ үрэлгэн байдлыг хязгаарласан бодлого хэрэгтэй" гэсэн юм. 

Мөн төсвийн алдагдлын талаар Бизнесийн ухааны доктор, эдийн засагч Б.Лхагважав "Манай үе, үеийн Сангийн сайд нар ийм заль хэрэглэж, үрэлгэн зардалтай, өндөр алдагдалтай төсөв баталж байгаа. “Ковид-19” цар тахал хэдэн ч жил үргэлжилж магадгүй нөхцөлд байдалд байна. Энэ талаас нь харвал бид цар тахалтай зэрэгцэж амьдрах нэгдсэн төсөв батлах ёстой. Гэтэл дахиад л өндөр алдагдалтай, сонгуулийн төсөв шиг юм оруулаад ирлээ. Өмнөх хоёр жилийн төсвийн алдагдал 8.8 их наяд төгрөгт хүрсэн. Ерөнхий сайд Л.Оюун-Эрдэнэ энэ алдаанаас огт сургамж авахгүй байна" гэжээ. 

Төсөвт үрэлгэн хандаж, үр ашигтай байлгаж чадахгүй алдагдал үйлдвэрлэх нь эдийн засагтаа дарамт болох, өрийн дарамтыг нэмэгдүүлэх, валютын ханшийг өсгөх, төлбөрийн тэнцэлд дарамт үүсгэх эрсдэлтэй.