Ирэх долоодугаар сарын 9-10-нд Монголын эдийн засгийн форум болно. Тус форумыг хэрхэн зохион байгуулах талаар Засгийн газрын өнөөдрийн ээлжит хуралдаан танилцуулга хийсэн талаар ЗГХЭГ-ын дарга Д.Амарбаясгалан мэдээллээ.

Тэрбээр "Хөрөнгө оруулагчид Монгол Улсыг сонирхож байна. Үүнийг дагаад Монголын эдийн засгийн форумд оролцох гаднын зочдын ранк дээшилсэн. Тухайлбал БНСУ-ын бизнес эрхлэгчдийн томоохон төлөөлөл оролцохоо илэрхийлсэн. Мөн Оюу Толгойн хувьцаа эзэмшигч Рио Тинто группийн ТУЗ-ийн дарга, гишүүд нь эдийн засгийн форумд оролцох, Оюу Толгой төслийн хөгжлийн асуудлаар цаашид манай Засгийн газартай яриа хэлэлцээр хийх талаар яригдаж байна. Эдийн засгийн форумыг төрийн гэхээсээ хувийн хэвшлийн оролцоог түлхүү хангах, олон улсын хөрөнгө оруулагчидтай дотоодын аж ахуйн нэгжүүдийн хамтын ажиллагааг дэмжих чиглэлээр Засгийн газар оролцоно" гэлээ.