РЕЙКЬЯВИК, 2023 оны арванхоёрдугаар сарын 19 /BBC/. Исландын баруун өмнөд нутгийн Рейкьянесийн хойгт хэд хэдэн удаа газар хүчтэй хөдөлсний дараа галт уул дэлбэрчээ.

Сэрсэн галт уулын ойролцоо оршдог загасчдын Гриндавик суурингийн 4 мянга орчим оршин суугчийг нүүлгэн шилжүүлж, ойролцоох “Blue Lagoon” халуун рашаан сувиллын газрыг хаасан байна. Галт уулын халуун хайлмаг орон нутгийн цагаар 22:17 цагт хотын хойд тал руу урсаж эхэлсэн тухай Исландын цаг уурын алба мэдээлжээ. 

10 дугаар сарын сүүлчээс хойш нийслэл Рейкьявик хотын бүсэд газар хөдлөлтийн идэвхжил нэмэгдэж, олон мянган чичиргээ бүртгэгдсэн байна.

Галт уулын халуун хайлмаг урсаж байгааг харуулсан зураг, дүрс бичлэг олон нийтийн сүлжээнд тавигдсан байна. Халуун хайлмаг урсаж байгаа газрууд, хэмжээг тогтоохоор эргийн хамгаалалтын нисдэг тэргийг илгээсэн гэж Исландын цаг уурын албанаас мэдээлжээ.

Иргэний хамгаалалтын албаны ахлах офицер Видир Рейниссон үндэсний телевизийн RUV компанид мэдээлэхдээ, галт уулын дэлбэрэлт агшин зуурт болсон, том ан цавуудаас гарсан лаавууд бүх чиглэлд урсаж байна гэжээ.

Д.Жаргал