“COVID-19”-ийн тархалт газар авч буй Европт Засгийн газрууд хөл хорионоос бусад арга хэмжээнүүдийг авахыг эрмэлзэж байна. Германд ресторануудыг хааж, томоохон арга хэмжээнүүдийг хориглох талаар судалж байна.

Италид “коронавирус”-ийн халдварын шинэ тохиолдол хамгийн дээд түвшиндээ хүрсэн бол Францад эндсэн хүний тоо дөрөвдүгээр сараас хойш огцом нэмэгджээ. Их Британид мөн энэ үзүүлэлт тавдугаар сарын эцсээс хойших хамгийн дээд түвшиндээ хүрсэн байна.

АНУ-ын 30 гаруй муж болон нийслэл хотын хэмжээнд эмнэлэгт хэвтэгсдийн тоо долоо хоногт 10 хувиар нэмэгджээ. Энэ сар гарснаас хойш тархалт улам эрчимжиж улсын эрүүл мэндийн салбарын ачаалал ихсээд байна. Чикаго, Денверт хязгаарлалтын арга хэмжээгээ чангатгажээ.

“Pfizer”-ийн вакцин үр нөлөөтэй эсэхийг энэ сарын эцэс гэхэд тогтоох магадлалтай гэж тус компанийн Гүйцэтгэх захирал мэдээллээ. Мөн Энэтхэгт вакцин хөгжүүлж буй хоёр компанийн нэг болох “Cadila Healthcare” үйлдвэрлэлээ нэмэгдүүлэх талд боломжит түншүүдтэй хэлэлцээ хийж байна.

Иранд дөрвөн минут тутамд нэг хүн “коронавирус”-ийн улмаас нас барсан нь бүртгэгдсэн талаар улсын цар тахалтай тэмцэх ажлын баг мэдээллээ.