АНУ-ын Ерөнхийлөгчийн сонгуулийн үр дүн тодорхой болж, Жо Байден ялалт байгуулсан ч түүний гол өрсөлдөгч, одоогийн Ерөнхийлөгч Дональд Трамп өнөөдрийг хүртэл ялагдлаа хүлээн зөвшөөрөхгүй байгаа юм. 

Жо Байденыг ялалт байгуулснаас хойш Трамп албан ёсоор мэдэгдэл хийгээгүй бөгөөд тэрбээр Твиттертээ шуудангаар илгээсэн саналууд дунд илэрсэн луйврын талаар Марк Левиний шоугаар удахгүй ярих болно гэж бичсэн байна.

Түүний хүргэн, зөвлөх Жаред Кушнер болон тэргүүн хатагтай Меланиа Трамп нар Дональд Трампыг Жо Байдены ялалтыг хүлээн зөвшөөрөхийг зөвлөсөн гэж CNN  агентлагаас мэдээлжээ. Тус агентлагт хоёр ч эх сурвалжаас Кушнер хадам аавдаа сонгуулийн үр дүнтэйгээ эвлэрэхийг зөвлөсөн гэж мэдээлсэн байна. Өөр нэгэн эх сурвалжийн мэдээлснээр тэргүүн хатагтай ч Дональд Трамп ялагдлаа хүлээн зөвшөөрөх цаг болсон талаар хэлсэн гэнэ. 

Үүний зэрэгцээ Трампын насанд хүрсэн хоёр хүү болох Дональд, Эрик нар бүгд найрамдахчуудыг сонгуулийн үр дүнг хүлээн зөвөшөөрөхгүй байхыг уриалжээ. 

CNN агентлагт эх сурвалжуудын өгсөн мэдээллээр бямба гарагт Жо Байденыг зарлах мөчид Ерөнхийлөгч Виржиниа мужийн Стерлинг дэх гольфын талбайд байсан бөгөөд тухайн үед сонгуулийн дүнг эсэргүүцэж үгүйсгээгүй байна. Гэлээ ч одоог хүртэл ялагдлаа хүлээн зөвшөөрч буйгаа албан ёсоор зарлаагүй юм. 

Харин Трампын сонгуулийн штабын төлөөлөгч Жэйсон Миллер Кушнерийг Трампад хандаж сонгуулийн үр дүнг хүлээн зөвшөөрөхийг зөвлөсөн гэдэг нь худал мэдээлэл хэмээн үгүйсгэсэн байна. Тэрбээр "Жаред шударга байдлыг хангахын тулд боломжтой бүх хууль ёсны арга хэрэгслийг ашиглах хэрэгтэй гэж  Трампад зөвлөсөн" гэжээ.

Байденыг дэмжигчид баяраа тэмдэглэж буй нь

Трампыг дэмжигчид сонгуулийн үр дүнг эсэргүүцэн жагсаж байна

Эх сурвалж: CNN