Австралийн Шинэ Өмнөд Уэльс мужид гарсан ойн томоохон түймэр 313 мянга гаруй га талбайг хамарсан бөгөөд гал сөнөөгчид хяналтдаа авч чадахгүй байгаа тухай тус мужийн түймэртэй тэмцэх газар мэдээлжээ.

Шинэ Өмнөд Уэльст түймрийн гурван голомт нийлж, одоо мужийн өмнөд хэсэгт томоохон түймэр асаж байна гэж түймэртэй тэмцэх газраас мэдээлсэн байна. Үүнтэй холбоотойгоор мужийн эрх баригчид ойролцоох бүс нутгуудын оршин суугчдад сэрэмжлүүлэг гаргажээ. Тэдэнд түймэр тархаж болзошгүй байгаа газар нутгаас нүүхийг зөвлөсөн байна.

Одоогийн байдлаар Шинэ Өмнөд Уэльс мужид 140 орчим түймэр асаж байгаа бөгөөд 2500 гаруй гал сөнөөгч түймэртэй тэмцэж байгаа ажээ.