​Япон Улсад шинэ төрлийн уушгины коронавирусний халдварын тохиолдол 4000 давж, Токио хот дахь нэг өдрийн халдварын тохиолдол 2022 оны 1 дүгээр сарын 6-ны өдрийн байдлаар 641-д хүрээд байна. Япон Улсын холбогдох мэргэжилтэн, судлаачдын зүгээс тус улсад коронавирусний халдварын “6 дахь” давлагаа эхэллээ хэмээн мэдэгдэж байна.  

Япон Улсын хэмжээнд коронавирусний халдвар өдөр ирэх тусам нэмэгдэж буйтай холбогдуулан тус улсын Засгийн газраас “Шинэ төрлийн ханиад, томууны эсрэг тусгай арга хэмжээ авах хууль”-д заасны дагуу Окинава, Ямагучи, Хирошима зэрэг мужуудад “Хөл хорионы хязгаарлалтын тусгай арга хэмжээ”-г энэ сарын 7-ны өдрөөс зарлахаар төлөвлөж байна.  

Өнгөрсөн оны сүүлчээр манай улсын иргэд олон тоогоор цуглан шинэ жилийн баяраа тэмдэглэснээс үүдэн коронавирусний кластер халдварын тохиолдол цөөнгүй гарсан тухай мэдээллийг тус ЭСЯ-нд иргэд ирүүлж байна.  

Коронавирусний халдварын тохиолдол хурдацтайгаар өсөн нэмэгдэж байгаа энэ цаг үед иргэдийг олон нийтийг хамарсан соёл, спортын томоохон арга хэмжээг зохион байгуулахгүй байх, энэ төрлийн арга хэмжээнд иргэд оролцохгүй байж өөрийгөө болон гэр бүлээ коронавирусний халдварын эрсдлээс урьдчилан сэргийлэхийг нийт иргэдээ анхааруулъя гэж Токио дахь Монгол Улсын Элчин сайдын яамнаас мэдээллээ.