​

Өвлийн олимпын ихэнх тэмцээн уралдаан Бээжин хотноо болно. Гэвч түм түжгэнэж, бум бужигнан байдаг Бээжин хот энэ өдрүүдэд нам гүмхэн дүнсийж, гудамж талбай нь эл хуль оргисон байдалтай байна. Хятадын цагаан сар энэ өдрүүдэд таарч, ихэнх хүн орон нутгийг зорьсон нь үүнтэй холбоотой байх. Нөгөө талаар тус улс олимпын наадмын үеэр хорио цээрийн хатуу дэглэм мөрдүүлж буй нь илтэд харагдана.

Зохион байгуулагчид хаалттай менежментийн системийг ягштал мөрдүүлж байна. Олимпын наадмын оролцогчид зөвхөн байр, тэмцээний талбай хооронд л явах боломжтой. Токиогийн олимпын үеэр иймэрхүү хязгаарлалт үйлчилж байсан ч сэтгүүлчид, оролцогчид ойролцоох дэлгүүр, эмийн сан, хоолны газраар үйлчлүүлэх боломжтой байв. Харин Бээжинд энэ бүгдийг хорьжээ. Сэтгүүлчид дэлгүүр орох шаардлага гарвал зөвхөн зочид буудал болон хэвлэлийн төвийн дэлгүүрээр үйлчлүүлэх боломжтой. Гэвч дэлгүүр нь ядмагхан бараатай, сонголт муутайн дээр хэтэрхий үнэтэй байгаа талаар сэтгүүлчид гомдоллоод эхэлжээ.

Харин хэвлэлийн төв болоод тэмцээний ордон, талбайд сэтгүүлчдийг ажиллах нөхцөлөөр маш сайн хангасан нь талархууштай.

Энэ удаагийн олимп нүүрстөрөгч ялгаруулдаггүй наадам гэдгээрээ онцлог. Наадмын Зохион байгуулах хорооны зүгээс Засгийн газар, албан ёсны түншүүдтэй хамтран нүүрсхүчлийн хийн ялгаруулалтыг бууруулах хатуу арга хэмжээг авч хэрэгжүүлж байна. Үүний хүрээнд олимпын тэмцээн уралдаан явагдах бүх байгууламж нүүрстөрөгчийн ялгарлыг бууруулах стандартыг хангажээ. Мөн олимпын наадмын бүх талбай, байгууламжийг байгаль орчинд ээлтэй сэргээгдэх эрчим хүчээр 100 хувь хангасан байна.  

Ингээд Бээжингийн олимптой холбоотой зурган мэдээллийг хүргэе.

Түм түжигнэж, бум бужигнаж байдаг Бээжин хот энэ өдрүүдэд нам гүмхэн дүнсийж, гудамж талбай нь эл хуль оргисон байдалтай байна

Хоолны газруудад ухаалаг хүргэлтийн систем үйлчилж байна. Үйлчлүүлэгчид ширээгээ сонгон хоолоо захиалсны дараа таны хоол гал тогооноос шууд таны ширээнд ирэх болно. Зөөгчийн үүргийг орлосон энэхүү систем цаашид өргөн хүрээг хамрах нь дамжиггүй.

Тамирчдын тосгоны хоолны өрөө. Энд үйлчлүүлсэн хүн бүр хоорондын зайгаа барьж, тусдаа суух ёстой.

Халбага, сэрээ нь бүгд нэг удаагийнх.

Ядарсан зочид унтаж амрах нэг хүний кабин ор. QR кодыг уншуулан хаалгыг онгойлгож, унтаж амрах хугацаа, доторх градусаа өөрөө тааруулна. Үйлчлүүлэхэд үнэ төлбөргүй.

Олимпын наадамд ирсэн хүн бүрээс Ковидын шинжилгээ авч, хаалттай менежментийн систем рүү нэвтрүүлж байна.

Бээжинд газардсан хүмүүсээс өдөр бүр Ковид илэрсээр байна. Хоёрдугаар сарын 2-ны лхагва гарагт 55 шинэ тохиолдол бүртгэгдсэн нь хамгийн өндөрт тооцогдож байна. Энэ тоо цаашид ч өсөх магадлал өндөр.

Монголын үндэсний олимпын хороо