Хойд Солонгосын удирдагчийн гэргий тус улсын бахархал болсон пуужингийн зүүлтээр гоёжээ. Ри Соль Жү өнгөрсөн Мягмар гаригт цэргийн генералуудад зориулсан баярын оройн зоогийн үеэр тив алгасах пуужингийн хэлбэртэй, мөнгөн зүүлтээр гангарсан нь олон хүний анхаарлыг татав. Зүүлтний хэлбэр нь өнгөрсөн жил амжилттай туршсан Хвасон-17 тив алгасах пуужин мөн гэж үзжээ. Тус пуужин нь АНУ-ын эх газарт хүрэх хүчин чадалтай гэж тооцогддог.

Хвасон-17 пуужинг өнгөрсөн Лхагва гаригийн шөнө Пёньянд болсон 75 дахь удаагийн цэргийн сүрт жагсаалын үеэр харуулсан. Түүнчлэн хатуу түлшээр ажилладаг шинэ төрлийн тив алгасах пуужинг мөн жагсаалын үеэр танилцуулжээ. Хойд Солонгос нь нийтдээ 11 ширхэг тив алгасах баллистик пуужингийн туршилтыг хийсэн.

Үүний зэрэгцээ баярын ширээний голд Ким Жон Уны "залгамжлагч" гэж тооцогдож буй Ким Чу-Аэ суусан нь таамаглалыг улам батлуулж байна. Тэрбээр цэргийн жагсаалыг төрийн ордны тагтан дээрээс эцэг, эхийнхээ хамтаар үзэж сонирхсон. Ким Жон Уны хоёр дахь хүүхэд гэж тооцогддог 10 орчим настай Ким Чу-Аэ нь өнгөрсөн арваннэгдүгээр сараас хойш тав дахь удаагаа олон нийтийн арга хэмжээнд оролцон, олны өмнө гарч байна.