Герман улс сүүлчийн гурван реактораа унтрааж, цөмийн эрчим хүчнээс татгалзсанаас хойш хэдхэн цагийн дараа Ням гарагт Финланд улсад Европын хамгийн том атомын цахилгаан станц ажиллаж эхэлжээ.

Olkiluoto 3 нэртэй уг станц хамгийн багадаа 60 жилийн хугацаанд тасралтгүй ажиллах төлөвлөгөөтэй юм байна.

Францын Арева компанийн тэргүүлсэн Areva-Siemens консорциум шинэ станцыг байгуулжээ. 2021 оны арванхоёрдугаар сард туршилтаар ажиллаж эхэлсэн станцыг өчигдөр албан ёсоор тогтмол ажиллагаанд шилжүүлсэн юм.

“Туршилтын үе дуусаж, өнөөдрөөс тогтмол ажиллагаанд шилжиж байна. Өнөөдрөөс эхлээд Финландын цахилгаан эрчим хүчний 30 орчим хувь Olkiluoto-д үйлдвэрлэгдэнэ” гэж станцын оператор компани TVO мэдээлжээ.

Финландын станц нь ганц реактораар 1,600 МегаВатт эрчим хүч үйлдвэрлэдэг гэдэг утгаараа Европ тивд хамгийн томд тооцогдож байна. Украины Запорожийн атомын цахилгаан станц мөн Европ тивдээ хамгийн томд тооцогддог ч зургаан реактортай юм.

Цөмийн эрчим хүчний эрсдэл, байгаль орчинд үзүүлэх нөлөөний асуудал Европ даяар маргаантай байгаа. Гэхдээ 2022 оны тавдугаар сард явуулсан судалгаагаар Финландын иргэдийн 60 орчим хувь цөмийн эрчим хүчийг дэмжиж байжээ.

Эх сурвалж: AFP