ОХУ-ын Ерөнхийлөгч Владимир Путин Херсон, Луганскийн эзлэгдсэн бүс нутагт очиж, цэргийн командлагч нартай уулзсан гэдгийг Кремль өнөөдөр мэдэгджээ. Гэхдээ энэ айлчлал яг хэзээ болсонг нууцалж байгаа аж.

Украины Херсон болон Луганск Ард улс өнгөрсөн онд ОХУ-ын бүрэлдэхүүнд нэгдсэн билээ. Путин Херсонд цэргийн командлалын хуралд оролцож, цэргийн дарга нарын илтгэлийг сонссон байна.

Херсон чиглэлийн “Днепр” цэргийн бүлэглэлийн штаб болон Луганск Ард Улс дахь “Восток” Үндэсний гвардын штабт хийсэн ажлын айлчлал урьдаас төлөвлөгдөөгүй гэнэтийн байсан гэдгийг Кремлийн мэдэгдэлд дурджээ.

Путин өмнө нь гуравдугаар сарын дундуур Мариуполь хотод гэнэтийн айлчлал хийж байсан юм. Дайны хөлд хамгийн ихээр сүйдсэн Украины Мариуполь хот өнгөрсөн оны 5-р сард Орост эзлэгдсэн.