• Энэ нь сүүлийн 10 гаруй жилийн хугацаанд Бээжингийн цэргийн удирдлагад хийгдэж буй хамгийн том өөрчлөлт юм
• Өнгөрсөн долоо хоногт Гадаад хэргийн сайд асан Чинь Ганыг үүрэгт ажлаас нь чөлөөлсөн
• Оронд нь 2013-2022 онуудад тус яамны сайдаар ажиллаж байсан Ван И-г эргэн томилсон

БНХАУ-ын дарга Ши Жиньпин Хятадын Ардын Чөлөөлөх Армийн пуужингийн цэргийн ангийг удирдаж байсан генерал Ли Ючао болон түүний орлогчийг үүрэгт ажлаас нь чөлөөлөхөөр болжээ.

Улмаар тэнгисийн цэргийн орлогч дарга асан Ван Хубин, намын төв хорооны гишүүн Сюй Сишен нарыг оронд нь томилохоор болсон байна. Энэ нь сүүлийн 10 гаруй жилийн хугацаанд Бээжингийн цэргийн удирдлагад хийгдэж буй хамгийн том төлөвлөгдөөгүй өөрчлөлт юм.

Азийн нийгэмлэгийн бодлогын хүрээлэнгийн гадаад бодлого, үндэсний аюулгүй байдлын мэргэжилтэн Лайл Моррис "Цөмийн зэвсгийн удирдлагуудыг сольсон нь Хятад улс сүүлийн хэдэн арван жилийн хугацаанд хийж буй цөмийн стратегийн хамгийн том өөрчлөлтүүдийн нэг юм” хэмээн хэлсэн байна.

Шинээр томилогдож буй удирдлагууд дэслэгч генералаас генерал болтлоо дэвшсэн. Тус албан тушаал нь Хятадын идэвхтэй алба хаагчдын хамгийн дээд цол аж. Өнгөрсөн долоо хоногт Хятадын Гадаад хэргийн сайд асан Чинь Ганыг үүрэгт ажлаас нь чөлөөлж, 2013-2022 онуудад тус яамны сайдаар ажиллаж байсан Ван И-г эргэн томилсон юм.

Эх сурвалж: ВВС