Монгол Улсын цахим шилжилтийн бодлогын хүрээнд Төрийн цахим үйлчилгээний зохицуулалтын газрыг шинээр байгуулж, төрийн үйлчилгээг операторын горимоор үзүүлэх “ХурДан” цэгийг улс орон даяар болон хилийн чанадад нийт 504 байршилд нээх ажил эрчимтэй явагдаж байна. Тус ажлын хүрээнд УИХ-ын гишүүн, Инновац, цахим бодлогын байнгын хорооны дарга Э.Батшугар дөрөвдүгээр сарын 13-ны өдөр БНЭУ-д суугаа дипломат төлөөлөгчийн газарт төрийн цахим үйлчилгээний “ХурДан” цэгийн нээлтийг хийлээ. Ингэснээр тус улсад ажиллаж, сурч, амьдарч буй Монгол Улсын иргэд төрийн үйлчилгээг ойроос, хүндрэл чирэгдэлгүй, хурдан шуурхай авах боломж бүрдэж байна.

Хилийн чанадад ажиллаж, амьдарч байгаа Монгол Улсын иргэдэд төрийн үйлчилгээг хүртээмжтэй хүргэхэд  анхаарч нийт 47 улсад “ХурДан” цэгийг байгуулахаар төлөвлөснөөс БНСУ-ын Сөүл, Бусан хотод гурван цэг, Австри улсын Вена хотод нэг цэгийг нээсэн бол БНЭУ-ын Дели хотод тав дахь цэгийг ийнхүү нээжээ.

“ХурДан” цэгээс төрийн 39 байгууллагын 440 орчим үйлчилгээг хүн, хуулийн этгээдэд операторын горимоор үзүүлж байгаа юм.  Цаашид үе шаттайгаар  55 байгууллагын 790 орчим үйлчилгээг үзүүлэх аж.

Өнөөдрийн байдлаар “ХурДан” цэгийг Улаанбаатар хотод хүн амын нягтрал ихтэй 14 байршилд нээж, үйл ажиллагаа нь эхэлсэн ба аймгуудад нээх бэлтгэл ажил хангагдаж байгаа юм байна. Ингэснээр иргэд “ХурДан” гэсэн брэндбүүк лого бүхий газраас төрийн үйлчилгээг өөрт хамгийн ойрхон цэгээс авах боломжтой болж байна.

Улаанбаатар хотод иргэдэд үйлчилж эхэлсэн цэгүүд:

-Баянзүрх дүүрэгт  Да хүрээ авто худалдааны төв,

-Хан-Уул дүүрэгт И-Март худалдааны төв, Монголын цахилгаан холбоо компанийн 120 мянгат салбар, 

-Сүхбаатар дүүрэгт Улаанбаатар Их Дэлгүүр, Монгол шуудан компанийн зарим салбарт “ХурДан” цэгийг нээгээд байна.

-Тун удахгүй Баянзүрх дүүрэгт Улиастай худалдааны төв, Хан-Уул дүүрэгт Хан плаза худалдааны төв, Сонгинохайрхан дүүрэгт Мянган машины зогсоол буюу 22-ын авто худалдааны төв зэрэг газруудад төрийн үйлчилгээний “ХурДан” цэг нээгдэх болно.