Испанийн Ла лигийн 23-р тойргийн “Бетис”-ийг 3:2 харьцаагаар хожсон тоглолтод “Барселона”-гийн довтлогч  Лионель Месси гурван гоолын дамжуулалтыг өгсөн байна. 

 

Өмнөх тойрогт “Леванте”-г (2:1) буулган авахад мөн л Леогийн хоёр гоолын дамжуулалтын ачаар “Барса” хожил байгуулсан. Ингэснээр Каталоны багийн өрсөлдөгчдийнхөө хаалгыг мялаасан сүүлийн таван гоолын бүх дамжуулалтыг Месси өгчээ.

 

Мөн аргентин залуу энэ улиралд арваас доошгүй гоол оруулж, арваас доошгүй гоолын дамжуулалтыг өгсөн Европын топ 5 лигийн хоёрдахь тоглогч болж байгаа юм.

 

Түүнээс өмнө энэхүү амжилтад Бундеслигийг тэргүүлэгчдийн нэг Дортмундын “Борусси” багийн хагас хамгаалагч Жейдон Санчо хүрсэн. Тэрбээр 12 гоол оруулж, 13 гоолын дамжуулалтыг багийнхаа хамтрагчдад өгөөд байгаа юм.

 

Харин Месси 14 гоол, 10 гоолын дамжуулалттай болоод байна.