Австрали улсад байгаа монгол иргэд яаралтай эх орон руу ирэх хүсэлтээ энд байгаа эцэг эх, асран харгалзагч нар нь өнөөдөр УОК-д өргөдөл барьж гүйж байна. Зөвхөн эрүүл мэндийн шалтгаанаар иргэдээ татаж байгаа гэх мэдээлэл үнэний ортой. Үүний тод жишээ Монгол улсыг Дэлхийн соёл урлагийн талбарт нэрээ дархалж яваа “The Hu” хамтлаг Австрали улсад гацсан байдалтай хоёр сар болох гэж байна. Тэгвэл тэднийг авчрах талаар хамтлагийн продюсер Б.Дашдондог удаа дараа УОК-д хандсан боловч “сөрөг хариу” авчээ.

Учир нь хамтлагийн хоёр дахь цомог маш чухал байдаг. “БСШУЯ УОК-д хандаад хамтлагаа авчрах сэтгэл байхгүй байв л гэж” халаглах фэнүүд ч байна. Энэ байдлаараа дэлхийд нэрээ дархалсан хамтлагаа татахгүй бол удахгүй цомог ч үгүй, нэр ч үгүй “гудамжинд” гарах эрсдэл үүсээд байна. Ядаж эх орноосоо уран бүтээлээ хийгээд дэлхийд онлайнаар хамтлагийн үйл ажиллагааг хэвийн явуулаад байвал болохгүй зүйл үгүй.  Хамтлагийн хувьд дэлхийд гарч ирсэн шигээ энэ эрчээрээ уран бүтээлээ хийгээд явбал Монголын нэр хүнд л өсөх байх. Тиймээс УОК тусгай нислэгээр урлаг соёлын хүмүүсээ ч бодолцох цаг ирсэн баймаар. Хамтлагийн хувьд ирэх зургадугаар сард европд аялан тоглолт төлөвлөж байжээ. Гэвч цар тахлын улмаас ямар ч аялан тоглолт хийхгүй нь тодорхой болж, цаашдын уран бүтээл хийх нөхцөл байдал ч хүнд байдалтай байна.