Өмнийн цэнхэр говийн хүү, нийтийн дууны нэртэй мастер Төмөрийн Батсайханыг нийтийн дуунд дуртай монголын ард түмэн андахгүй. Тэгвэл авьяаслаг дуучин маань өнөөдөр ерөнхийлөгчийн зарлигаар МУГЖ цол тэмдэгээр шагнууллаа. Тэрээр дунд сургуулиа төгсөөд нутгийнхаа ХДТ-т ажиллаж байгаад СУИС-ийн дуурийн дуулаачийн ангид элсэн орж МУГЖ О.Ичинхорлоо багшийн гарын шавь болсноор дуулах эрдэмд шамдан сурсан юм. Нарийн цээл хоолойтой бор хүүг багш нь дуурийн ирээдүйтэй дуучин болгохын төлөө чармайн хичээллүүлж байсан ч Батсайхан цагийн аясыг даган нийтийн дуунд хөл тавьж багшийнхаа сэтгэлийг багагүй гонсойлгосон гэдэг. Дуучин Г.Эрдэнэтунгалагтай хамтран “Ханьсахын жаргал” дууг дуулсан нь амжилттай болж түүнийг Монголын ард түмний хайртай олны танил дуучин болох эхлэлийг нь тавьсан юм. Түүний дуулсан Үр минь, Говь шанхын нутаг, Ээжтэйгээ байх жаргалтай зэрэг дуунуудыг олон нийт сайн мэднэ.