ХӨСҮТ-ийн хоёр, Дархан-Уул аймгийн салбар лабораторид өчигдөр 330 хүнд шинжилгээ хийлээ. Шинжилгээгээр бүгдэд вирус илрээгүй. Үүнд долдугаар сарын 4-нд Токио-Улаанбаатар чиглэлийн тусгай нислэгээр ирсэн хүмүүс багтаж байгаа. Мөн ачаа тээврийн жолооч нарийн сорьц багтаж байгаа. Батлагдсан тохиолдол 287 болж, 213 нь эдгэсэн. Одоогоор ХӨСҮТ-д 74 хүн эмчлүүлж байна. Эмчлүүлж байгаа хүмүүсийн 64 нь хөнгөн, 14 нь хүндэвтэр байна. 113 хүн эмчилгээ, хяналтад байна. Бид тусгай үүргийн нислэгээр ирэх иргэдийг хүлээж авах бэлтгэлээ хангаад байна

Сөүл-Улаанбаатар чиглэлийн тусгай үүргийн онгоц өнөөдөр өглөө 08.47 цагт Улаанбаатараас хөөрчээ. Тус нислэгээр 260 иргэн эх орондоо ирэх бөгөөд 17.10 цагт “Буянт-Ухаа” олон улсын нисэх буудалд газардах хуваарьтай аж.

Үүний зэрэгцээ, маргааш Улаанбаатар-Токиогийн чиглэлд тусгай үүргийн онгоц хөөрөх бол долдугаар сарын 26-нд Улаанбаатар-Франфурт чиглэлд Европд байгаа иргэдийг татан авна. Мөн нэмэлтээр долдугаар сарын 28, 29-нд Улаанбаатар-Сөүл чиглэлд дахин хоёр удаагийн нислэг үйлдэх бол долдугаар сарын 30-нд Улаанбаатар-Сидней чиглэлд нислэг үйлдэж, нийт 1470 иргэнийг татан авах төлөвлөгөөтэй байгаа талаар мэдэгдлээ.