• Ирэх оны хоёрдугаар сард Австрали улсад болно
• Судлаачдаас сэдэвтэй холбоотой судалгааны ажил хүлээн авч байна
• Хурал гурван өдөр үргэлжилнэ

Австрали улсын Мелборнийн Их сургууль дуучин Тэйлор Свифтийн соёл урлаг, эдийн засгийн салбарт үзүүлсэн нөлөөний талаар эрдэм шинжилгээний хурал зохион байгуулахаар болжээ.

Тодруулбал дуучин бүсгүй өдгөө “Eras” аялан тоглолтоо хийж байгаа бөгөөд ирэх оны хоёрдугаар сард Австрали улсад очих хуваарьтай юм. Түүний тоглолтоос өмнө уг хурлыг зохион байгуулахаар төлөвлөж байгаа аж.

Хурлаар Тэйлор Свифтийн соёл, дуу хөгжим, уран зохиол, эдийн засаг гээд олон салбарт үзүүлж буй нөлөөний талаар хэлэлцэх юм байна. Хурлыг зохион байгуулахад Австрали, Шинэ Зеландийн долоон их сургууль хамтарч байгаа гэв.
“Свифтпозиум” нэртэй уг хуралд Ази, Номхон далайн бүсийн судлаачдаас хурлын сэдэвтэй холбоотой судалгааны ажил хүлээн авч байгаа гэнэ.

Мөн өнгөрсөн долоо хоногт хэвлэл мэдээллийн салбарын томоохон төлөөлөгчдийн нэг “Gannett” компани зөвхөн Тэйлор Свифтийн талаар сурвалжлах сэтгүүлч хайж буйгаа мэдэгдсэн. Энэ чиглэлд ажиллах сэтгүүлч жилийн 100 мянган ам.долларын цалин авах боломжтой юм.
Эх сурвалж: CNN