Ерөнхий сайд У.Хүрэлсүх өнөөдөр байгалт орчин, аялал жуулчлалын салбарын үйл ажиллагаатай ажиллаж байна. 

 

БОАЖЯ 121 албан хаагчийн  орон тоотой 7 газар, 7 хэлтэстэй ажиллаж байна. Тусгай хамгаалалттай газар нутгийн 34 захиргаа ажилладаг. УЦУОШГ, нөгөөх нь шинээр байгуулагдсан Усны газар гэсэн хоёр агентлагтай гэх мэтээр салбарын сайд Д.Сарангэрэл товч танилцуулав. 

 

Сайд Д.Сарангэрэл, БОАЖЯ энэ дөрвөн жилд хогны асуудлыг шийдвэрлэхэд гол анхаарал хандуулж ажиллана. Үндэсний хэмжээнд 4.3 сая тонн хог гардгийн 1.3 сая тонн нь Улаанбаатар хотод гардаг. Нийслэлд хог боловсруулах үйлдвэрүүд бий. Нэмж үйлдвэрүүд байгуулахад хувийн хэвшлийнхэнтэйгээ хамтарч ажиллана гэлээ. 

Ерөнхий сайд У.Хүрэлсүхийн байгаль орчны салбарын албан хаагчдад хандаж хэлсэн үгийг хүргэж байна. 

 

Тэрбээр, Улаанбаатар хотын утааг арилгахаас гадна аймгуудын утааг бууруулахад анхаарахаас аргагүй болсон. Одоо дийлэнх аймаг утаатай болсон. Нийслэлийн агаарын бохирдол өнгөрсөн жил 50 хувь буурсан. Ирэх дөрвөн жилд 80 хувь хүртэл бууруулах зорилт тавьсан. 

 

Ерөнхий сайдын өгсөн үүрэг чиглэлийн дагуу “Яндангаа хөөлье” аянг сайн зохион байгуулж, үр дүнтэй ажилласан. 

Улаанбаатар бол хогондоо дарагдсан хот болсон. Хогны үйлдвэр зайлшгүй хэрэгтэй. Хогны үйлдвэр ашигтай, ашиггүй ажиллах нь чухал биш. Хогны үйлдвэрийн үр ашгийг шууд бус дам утгаар нь ойлгох хэрэгтэй. Мөн хог хаяхгүй байх соён гэгээрлийн ажлыг сайн хийх хэрэгтэй. Хог хаяна гэдэг хүний ухамсрын асуудал. Өнгөрсөн жилүүдэд бид ард түмнийхээ соён гэгээрлийг орхигдуулсан.