Баян-Өлгий аймгийн Сагсай сумын 6 дугаар багийн “Даян нуур” гэдэг газарт живсэн автомашины ачиж явсан таван тонн тоосгоноос нэг тонныг нь буулгажээ. Өнөөдөр автомашиныг татан гаргах ажиллагааг дахин үргэлжлүүлэх аж. 

Өнгөрсөн арванхоёрдугаар сарын 1-ний өдрийн 05:30 цагт аймгийн төвөөс баруун урд зүгт 178 км, сумын төвөөс баруун урд зүгт 148 км-т иргэн А-ын жолоодож явсан ачааны автомашин живсэн дуудлага иржээ. Цаг агаарын байдлаас шалтгаалж автомашиныг татан гаргах ажиллагааг тухайн өдөр зогсоосон бөгөөд Онцгой байдлын ерөнхий газрын даргын шийдвэрээр өнгөрсөн баасан гарагт автомашиныг татан гаргах ажиллагааг эхлүүлсэн байна. Тус аймгийн Онцгой байдлын газрын Эрэн хайх, аврах салбарын 8 алба хаагч, 1 автомашин, орон нутгийн 30 иргэн, 7 автомашин, нийт 38 хүн, 8 автомашинтай нэгдүгээр сарын 5-ны өдрийн байдлаар нуурын усанд 3 метрийн гүнд 4 удаа шумбалт хийж, осолдсон автомашиныг “Зил-130” загварын ачааны 3 автомашинаар татаж,  автомашины хойд талыг нуурын уснаас 50 см гаргаж, 5 тонн тоосгоос нэг тонн тоосгыг буулгасан байна.

Живсэн автомашин нь нуурын эргээс 500 метр орчим зайтай, мөсний зузаан 1 метр,  ёроол нь 1 метр орчим шавартай байгааг ОБЕГ-аас мэдээллээ.